2021-ci yılın son günnerindä Ankarada basıldı uşaklara deyni gercik bir kiyat – «Kürt-kuş dünnesi», angısına girdi halk masalları, açıklamalı söleyişlär hem gagauz yazıcılarının yaratmaları.

Kiyat hazırlandı Gagauziya M.V. Maruneviç adına bilim-aaraştırma merkezindä (hazırlayan – Petri Çebotar, resimci – Natalya Vornikova).

Kiyadı tiparladı türk halklarının kulturasını destekleyän anılmış organizațya – «Türksoy». Yanvarın 7-sindä Türkiyanın baş kasabasında geçti kiyadın ilk prezentațiyası.

Kiyadın çıkması için çok zaamet etti Moldova Respublikası Parlamentinin deputatı İvanna Köksal. Şükür ederiz ona hem hepsinä, kim yardımcı oldu hazırlamaa hem tiparlamaa bu kiyadı.